К ва́м, прароди́телем на́шим, о Ада́ме и Е́во, прибега́ем мы́, немощна́я ча́да ва́ша. Воззри́те ми́лостивно на на́с с высоты́ небе́сныя ва́шея сла́вы и бу́дите на́м помо́щницы во искуше́ниях и собла́знех, от врага́ ро́да челове́ческаго на́м прибыва́ющих. А́ще и соблазни́лися есте́ дре́вле льсти́вными глаго́лы зми́евыми и лиши́лися рая́ сла́дости, пребы́сте оба́че оста́ток земны́я жи́зни ва́шея в покая́нии и сокруше́нии о неразу́мии свое́м, и та́ко снидо́сте во оби́тели печа́ли. В после́док же дни́й прии́де Обетова́нный, е́же сокруши́ти держа́ву кня́зя ми́ра сего́. Пред спаси́тельными же страда́ньми Свои́ми предпосла́ ко отше́дшим живота́ сего́ пропове́дника покая́ния, и́же бы́сть предте́ча Его́ на земли́ и в преиспо́дних земли́. Вы́ же с ра́достию послу́шасте слове́с сего́, разумева́юще, я́ко о Се́мени ва́шем глаго́лет. По ма́ле же вре́мене потрясе́ся а́д и огорчи́ся, сни́де бо Разруши́тель а́да. Огорчи́ся а́д, и́бо упраздни́ся, огорчи́ся, и́бо пору́ган бы́сть, огорчи́ся, и́бо умертви́ся, огорчи́ся, и́бо связа́ся. Вы́ же возвесели́стеся и взыгра́сте ду́хом, зря́ще Искупи́теля ва́шего, по пло́ти от ва́с происше́дшаго, Бо́га же су́ща безнача́льна и Отцу́ соприсносу́щна. Си́це у́бо и на́с сподо́бите земно́е сие́ и многоско́рбное житие́ в покая́нии преити́, в бу́дущей же жи́зни зре́ти вы́ну Спаси́теля ду́ш на́ших и Го́спода на́шего Иису́са Христа́, Ему́же со Отце́м и Ду́хом подоба́ет че́сть и поклоне́ние ны́не и при́сно и во ве́ки веко́в. Ами́нь.